秋季除咗 秋電展 之外，仲有一個聽個名都知幾得意嘅 Trade Fair：香港國際秋季燈飾展（秋燈展）。場內除咗有知名嘅大品牌燈飾同智能照明方案，仲有一啲 crowd funding 嘅產品，以及美觀實用嘅燈飾添！
曼佳美 – 熒智 ZB 智能照明方案
▲ 曼佳美 Megaman 嘅工程師喺度介紹熒智 ZB 智能照明方案
曼佳美呢個 Brand，燈膽就聽得多，其實佢哋都有自家嘅熒智 ZB 智能照明方案。唔好以為講到咁 Pro 好似好複雜，其實就好似圖入面啲元件咁，簡單一兩個 ZB 嘅裝置連接到控制系統（網關），咁就可以經智能手機、平板電腦甚至 Amazon 嘅 Alexa 控制照明嫁啦！
除咗主動調校照明開關、光暗、色調等等，ZB 智能照明方案仲配搭咗一啲傳感器，例如電磁開關、紅外線等等，呢啲傳感器一旦觸發到的話，可以係自動開燈，又或者當做防盜系統咁 send 個訊息畀屋主，玩法十分靈活。
Yoswit – 簡單 DIY 智能家居
Yoswit 係一間香港公司喺 2016 年建立嘅品牌，同年佢哋喺 Kickstarter 成功集資添！
佢嘅安裝相對簡單，基本上就係搵電工師傅換咗現有嘅燈掣（或電掣），唔需要加裝任何 Hub 或者額外嘅控制器，就可以直接用流動裝置嘅藍牙，控制屋企所有電氣產品嘅電源啦！
而如果想喺街外面都可以控制屋企嘅電器電源呢，只要屋企有部舊手機，就可以用佢嚟做控制器，所有 Yoswit 嘅裝置會以 mesh network 方式建構網絡，然後一開個 App 就可以用，連線過程自動化，唔需要好似平時配對藍牙裝置咁搞一大餐。
LED 燈膽與防水燈飾
LED 燈膽就唔係啲咩新鮮事，不過用 LED 技術去扮返燈膽嘅外觀同光度，就真係要有啲技術啦！上圖嘅呢一款除咗真正用嚟照明之外，睇落都好靚！
▲ 各式各樣嘅 LED 燈膽，扮鎢絲嘅部份可以有唔同嘅玩法，而且又慳電又唔會太熱！
至於戶外燈飾，夠光之餘最重要都係防水！呢一個廠商講解防水燈膽嘅原理，其實就係防止外來空氣接觸到燈膽接電嘅部件，從而造到防水嘅效果！而圖中膠箱裝住嘅燈膽，同款曾經喺銅鑼灣恩平道出現過，一條條咁整咗個天幕咁款，好靚！